नव्या पोलीस उपनिरीक्षकांनी सर्वसामान्य माणसाचे आधारवड व्हावे - आर.आर.पाटील

नाशिक रिपोर्टर..: कठीण असे समजले जाणारे प्रशिक्षण घेवून सर्व पोलीस उपनिरीक्षक प्रशिक्षण केंद्रातून बाहेर पडत आहेत. येथून बाहेर पडताना ‘सद्रक्षणाय खलनिग्रहणाय’ या ब्रीदवाक्याला जागृत राहून काम करा. तसेच महाराष्ट्रातील सर्वसामान्य माणसाचा आधारवड व्हा, असे प्रतिपादन राज्याचे गृहमंत्री आर.आर.पाटील यांनी केले. नाशिक येथील महाराष्ट्र पोलीस प्रबोधिनी येथे आयोजित प्रशिक्षणार्थी पोलीस उपनिरीक्षकांच्या 108 व्या सत्राचे दीक्षांत संचलनाच्या वेळी ते बोलत होते. याप्रसंगी गृह राज्यमंत्री सतेज पाटील, महासंचालक संजीव दयाल, अपर पोलीस महासंचालक सुर्यप्रताप गुप्ता, पोलीस आयुक्त कुलवंत कुमार सरंगल, नाशिक परिक्षेत्रातील विशेष पोलीस महानिरिक्षक धनंजय कमलाकर, विभागीय आयुक्त रवींद्र जाधव, जिल्हाधिकारी विलास पाटील व महाराष्ट्र पोलीस प्रबोधिनीचे संचालक संजय बर्वे उपस्थित होते. श्री. पाटील म्हणाले, ज्या महत्वपूर्ण सेवेत आज पोलीस उपनिरीक्षक प्रवेश करतायत त्यासेवेचा लौकिक आपल्या माध्यमातून व्हावा. 108 या सत्रातून 1529 पोलीस उपनिरीक्षक आज बाहेर पडत आहेत. राज्यातील नव्हे तर देशातील सर्वात मोठी भरती आहे. त्यात 465 महिला पोलिस उपनिरीक्षक पोलिस दलाला प्राप्त होत आहेत. इतर राज्यापेक्षा सर्वाधिक महिला पोलिस अधिकारी व महिला पोलिस कर्मचारी या महाराष्ट्र पोलिस दलात आहेत. मागील तीन वर्षातील बॅच मधून महाराष्ट्र पोलिस अकादमीने जवळ जवळ 4 हजार पोलिस अधिकारी महाराष्ट्र पोलिस दलाला उपलब्ध करुन दिले आहेत. शूरत्वाचा संपन्न वारसा आपल्या महाराष्ट्राला लाभला आहे. जसा वर्दीचा रुबाब आहे, तशी जबाबदारीही तितकीच महत्वाची आहे. देशाच्या सीमेचे रक्षण करण्याची जबाबदारी जशी जवानांची आहे, तसेच अंतर्गत कायदा व सुव्यवस्था व जनतेच्या जिवीताचे रक्षण करणे हे सुद्धा तितकचं महत्वाचे आहे. म्हणून सर्व प्रशिक्षणार्थी पोलिस उपनिरीक्षकांनी आपली सेवा ही प्रामाणिकपणे द्यावी. श्री. पाटील यांनी यावेळी सर्व पोलिस उपनिरीक्षकांना जाणिव करुन दिली की, पोलिस सेवेत मेरीट नुसार विद्यार्थी येतात. तसेच बदल्या देखील मेरीट नुसार होतात. म्हणून गुणवत्तेनुसार पुढे या. मिळालेल्या प्रशिक्षणाचा उपयोग करा. गुन्हेगार खाली मान खालून जाईल व सर्वसामान्य माणूस हा ताठमानेने जगेल असे वातावरण तयार करा अशी अपेक्षा त्यांनी यावेळी व्यक्त केली. सर्व प्रशिक्षणार्थी पोलिस उपनिरीक्षकांना कुंटुंबियांसोबत काही काळ घालविण्यासाठी 3 तारखेपर्यंत सुटी जाहीर करण्याची सूचना त्यांनी पोलिस महासंचालकांना दिली.                                                          महाराष्ट्राला अग्रेसर ठेवण्यात पोलिसांचा सिंहाचा वाटा - राज्यमंत्री सतेज पाटील विकसनशील राज्यात काम करण्याची संधी सर्व प्रशिक्षणार्थी पोलिस उपनिरीक्षकांना या विभागाच्या माध्यमातून मिळत आहे. आजवर महाराष्ट्राने जी प्रगती केली आहे, त्यात पोलिस विभागाचा सिंहाचा वाटा आहे. या ट्रेनिंगचा उपयोग सर्व पोलिस उपनिरीक्षकांनी सातत्याने करावा. आई-वडीलांना व आपल्या मातीचे भान ठेवून काम करा अशी अपेक्षा राज्यमंत्री सतेज पाटील यांनी यावेळी व्यक्त केली. कायद्याचे सेवक व जनतेचे रक्षक असावे - संचालक संजय बर्वे   आजवरची सर्वात मोठी अशी 1529 प्रशिक्षणार्थी पोलिस उपनिरीक्षकांची तुकडी बाहेर पडत आहे. नवीन अभ्यासक्रमानुसार सर्व प्रशिक्षणार्थींना प्रशिक्षण देण्यात आले आहे. सर्व प्रशिक्षणार्थी पोलिस उपनिरीक्षकांनी कायद्याचे सेवक व जनतेचे रक्षक म्हणून काम करावे. पोलीस खात्याला, कुटुंबाला अभिमान वाटावा असे कार्य करा, असे श्री. बर्वे यांनी सांगितले. जनतेचा सेवक म्हणून सेवा करायची आहे - बेस्ट ट्रेनी ऑफ द बॅचचा किताब प्राप्त राजेंद्र गुरव बेस्ट ट्रेनी ऑफ द बॅचचा किताब मिळविलेल्या राजेंद्र गुरव म्हणाला, मी गेल्या 8 वर्षापासून नोकरी करत आहेत. चार वर्षे शिपाई म्हणून तर साडेचार वर्षे राज्यगुप्त वार्ता विभागात सहाय्यक गुप्तवार्ता अधिकारी म्हणून काम केले आहे. मी मूळचा कोल्हापूर येथील ता.भुदरगड येथील कोनवडे गावाचा राहणार आहे. बेस्ट ट्रेनी ऑफ द बॅचचा किताब व मानाची तलवार मिळाल्यामुळे मला खूप आनंद होत आहे. कार्यक्रमाचे सुत्रसंचालन सीमा पेठकर, छाया देवरे व चेतन लोखंडे यांनी केले. गृहमंत्री आर.आर.पाटील यांचे हस्ते प्रशिक्षणार्थींना पारितोषिकाचे वितरण 1. लाटे यशवंतराव चव्हाण सुवर्ण चषक - बेस्ट ट्रेनी ऑफ द बॅचचा किताब –राजेंद्र दिनकर गुरव 2. वर्तणूक शास्त्रामधील उत्कृष्ट प्रशिक्षणार्थी- सुहास भिमराव कांबळे 3. तुकडीची अष्टपैलू प्रशिक्षणार्थी म्हणून अहिल्याबाई होळकर चषक उत्कृष्ट महिला प्रशिक्षणार्थी म्हणून सावित्रीबाई फुले चषक- तेजश्री रोहिदास शिंदे 4. सेंकड बेस्ट ट्रेनी ऑफ द बॅचचा किताब- मयुर साहेबराव भामरे 5. उत्कृष्ट कायदा प्रशिक्षणार्थी- अमोल रामचंद्र कोलेकर 6. डॉ. बी.आर.आंबेडकर चषक- अमोल रामचंद्र कोलेकर 7. उत्कृष्ट प्रशिक्षणार्थी रायफल आणि रिव्हॉलवर शुटिंग एन.एम.कामठे चषक – विलास वसंत कुटे 8. पी.टी.मधील उत्कृष्ट प्रशिक्षणार्थीचा- राजेंद्र दिनकर गुरव 9. उत्कृष्ट प्रशिक्षणार्थी टर्न आऊट- रोशन जिभाऊ देवरे 10. उत्कृष्ट खेळाडू प्रशिक्षणार्थीचा किताब- खान झुनेद बशीर 11. उत्कृष्ट आधुनिक तंत्रज्ञान प्रशिक्षणार्थीचा किताब- कोरबू सुरेश सयाजी 12.उत्कृष्ट अभ्यासू प्रशिक्षणार्थी-भामरे मयुर साहेबराव 13. उत्कृष्ट सांस्कृतिक प्रशिक्षणार्थी- हर्षल सतीश कामराज 14. उत्कृष्ट गुन्हे शोध प्रशिक्षणार्थी- राठोड अविनाश अशोक 15. उत्कृष्ट क्रिमिनालॉजी व पेनालॉजी प्रशिक्षणार्थी- सुवर्णा महादेव माने